خپل ټټو د بل آس برابروي

حکيم روان

ګرانو هيوادوالو ته پته ده چې د امريکايي يرغل وروسته طالبان په منډو ستړي شول او په وار وار يې حامد کرزی ته سړي او پيغامونه راليږلی وو چې دوی غواړي د حکومت سره د سولې ، روغې او جوړې خبرې وکړي .

هغه وخت کرزی په دوو خرو سپور وو ، د شمالی ټلوالی د جهاد او مقاومت په خره او د امريکا په خره . کرزی هغه وخت د چا خبرې او عذرونه نه اوريدل .

د جهاد او مقاومت ټيکه دارانو په شمال کې  په ځانګړی توګه د بی وسلی شوو طالبانو پر ضد او په عامه توګه د پښتنو پر ضد بګنوونکی جنايتونه کول . پښتانه يې د خپلو کورونو ، ځمکو او جايدادونو په کتلوي توګه شړل ، په لکونو داخلی مهاجر پیدا شول . خو هغه وخت کرزی د واک په نيشه بی ځانه وو او د چا د چيغو ، ژړاګانو او فريادونو په کېسه کې نه وو . هغه وخت  کرزی د خپلو جهادي «وطن پالونکو!» سره د نړيوالو مرستو او ملياردونو په چور اخته وو . نور جهاديان يې چې ملياردونو ته يې مستقيم لاسرسۍ نه درلود ، د عامه شتمنيو او خلکو د کورونو او ځمکو په غصب او د ترياکو په کر او قاچاق اخته شول . طالب يې د دوهم ځل له پاره په لوی لاس پنجاب ته په ګير ورکړاو د کرزی د وحشی جهادی حاکمانو د ظلمونو له امله هيڅ طالب په لوی لښکر واوښت .

د کرزی په «طلايي» دوران کې ډیر ژر د چور له برکته په هيواد کې د چورګرو له خوا د عينو مينو په شان ښارګوټی را منځته شول ، په دوبۍ ، ترکيه ، لندن او نورو خارجی هيوادونو کې د ناڅاپی افغان ملياردرانو شرکتونو ، بانکونو او بلډينګونو سرونه را پورته کړل . خو افغان ملت ورو ، ورو د اور جهنم ته ښوئيده . نن کرزی خان ، معلم عطا چور ، بی حياء محقق ، ګوډ اتمر د چور او جنايت شريکان غواړي خپل ټټو د اشرف غنی د آس سره برابر کړي .

–  اشرف غنی د افغانستان په تاريخ کې لومړنۍ انسان دی چې د حکومتی چارواکو د شتمنيو د درج کولو وړانديز يې کړی دی .  هغه وخت کرزی خپل چورګر ولی په دې کار ملزم نه کړل ؟ آ ها ، ځکه چې بيا خو ټول د کرزی ياران په کې راتلل ؟

–  «سوله غوښتونکی» کرزی ولی د خپل واک په «طلايي» دوران کې طالبان سولی او اوربند ته نه رابلل ؟ چا د لومړي ځل له پاره او د دوهم او دريم ځل له پاره يو طرفه اوربند اعلان کړ؟ کرزي دا د سولی نوي پتنګ او که اشرف غنی ؟ آيا د کرزی ، محقق او عطا چور ټټو د اشرف غنی د آس سره د برابريدو دی ؟

–  چا د کابل د بی قيده او شرطه سولې کنفرانس داير کړ ؟ کرزی او که اشرف غني ؟ چيرې ټټو او چيرې آس ؟

–  چا پر غلو او نامسؤله وسله والو بريد وکړ او څوک د غلو او نامسؤله والو تر شا ولاړ دي ؟ جهادی غله او چورګر او له هغه جملی د دوی سردمدار کرزی او که اشرف غني ؟

–  چا د افغان سولې له پاره په اندونيزيا او جده کې د اسلامی علماؤ کنفرانسونه داير کړل ؟ چورګرو چې نن د طالبانو پښو ته په لويدو کې مسابقې لري او که اشرف غني ؟ په کومو سترګو او منطق جهادی چورګر او طالبي نوکران افغان سرلوړي ولسمشر اشرف غنی په بی حيايي سره په دې تورنوي چې ګوندې د سولې ضد دی ؟

–  چا د جنګ اصلی علت ( پاکستان ) د تروريسم د روزونکی او ملاتړي په توګه نړيوالی انزوا ته کش کړ؟ کرزی او که اشرف غنی ؟ جهادی غلو او چورګرو ؟ او که متفکر وطن پالونکی افغان ولسمشر اشرف غني ؟

چا افغانستان د پاکستانی تورمخو او تروريست روزونکو غلو له ترانزيتی استبداده خلاص کړ او د افغانستان پر مخ يې چابهار ، د لاجوردو لار او هوايي دهليزونه خلاص کړل ؟ مجاهد کرزی او که اشرف غنی ؟ حيا په کار ده ، له دې مظلوم ملته چې پاکستان او طالبانو په وينو لړلی دی او تاسو مفسدينو چور کړی دی ، وشرميږئ !

څوک د اشرف غنی برابر دی ؟ هغه سړی دی جرأت وکړی او خپل نوم دې واخلي ؟ غلو وشرميږئ؟

هغوی چې افغانستان او اشرف غنی د پاکستان په داخلی چارو کې په مداخله تورنوي ، د اشرف غنی سره ځان برابروي ؟

څنګه ټول غله او تورمخي د اشرف غنی په وړاندې په بی شرمی او بی حيايي سره يو شوی دي ؟

اې افغان ملته ! راويښ شه ! ستا په پاکه لمن را لوی شوی ناخلفه زامن ، ستا ريښې کاږي او ستا وياړلی هيواد خرڅوي او ستا انتخابی ولسمشر چې هيله لري ، تاسو له دې ظالمانو خلاص کړي غواړي نسکور کړي !

دا غله تش په نامه مجاهدين چې له باډيګارډانو او مرمی ضد موترو پرته دوه ګامه وړاندې د تګ جرأت او شهامت نه لري ، غواړي تاسو باتور افغان ملت د نورو او ځان اسير وساتي ! سوله ستاسو بنيادی حق دی چې داخلی غلو او د خارجی شبکو زنځيري سپيو له تاسو اخيستی دی .

افغان ولسمشر اشرف غنی د خپل ملت د اساسی او حياتی حق سولې په لاره کې تر هر چا رښتينی او غښتلي ګامونه آخلی . رښتينی سوله راتلونکی ده ، د خپل ولسمشر ملا وتړئ !

بريالی دې وی پوره ، ژر رارسيدونکی دايمی او عادلانه سوله !