پاڅیږه وطنه!”

 
‎غرزی لایق‎s foto.

سليمان لايق

زړه دی د پولادو که منګولی دی د زغرو
مټــــی ابدالی که د رزمونو د سنــــګرو
وڅنډه لمـــــــن لـــه دی قاتـــــلو ږیرورو
پاڅیږه وطنه!
[]
پاڅیږه چی اور در باندی بل دی او ایره سوی
مال غوندی لیلام سوی په پردیو اجاره سوی
ژوند درکی ویده سو، د مرګونو هـــــدیره سوی
پاڅیږه وطنه!
[]
پاڅیږه چی ژوند دی مسخره شو د غلام
ورک دی شو د بل په مرامــونــو کی مرام
کفر ته غلام شوی په نامه کی د اسلام
پاڅیږه وطنه!
[]
اور دی لګیدلــی په واټـونـو او ښــارونــو
وینی دی بهیږی لـــه هر رګ نه په جامونو
ته شوی یو ګډوری د معصومو ارمانونو
پاڅیږه وطنه!
[]
نـــوی اســلام راووړ د پتـــرلو عــربــانـــو
دین یوه ټیکه شوه د بی لاری آخوندانو
کفر تاوان شوی په سوچــه مسلمــانانو
پاڅیږه وطنه!
[]
راغله جهادیان د تا تالان ته په لښکرو
لار وهی کابل ته ستا د مړیو په ککرو
ښځی رانه واخیستی عربو او غجرو
پاڅیږه وطنه!
[]
تیغ د احمدشاه په پنجابی غلام ګرو شو
جام د سکندر په جواری کی لاړه دو شو
زموږ ښکلی کابل په انګریزی لنچرو لو شو
پاڅیږه وطنه!
[]
وچی شوی په خوله د ماشومانو کی سندری
وشـــلیدی د میندو په ککـــو کـــی مرغــــلری
حـق کـی د افغـــــان شو د دنیــــا زړه دبـــری
پاڅیږه وطنه!

پیښورـ برتهکال ۴-۹-۱۳۷۲

·